Psa 10 | NdeIBE | STEP | Kungani, O Jehova, umela khatshana? Kungani uzifihla ngezikhathi zokuhlupheka?

Psalms 10

1 Kungani, O Jehova, umela khatshana? Kungani uzifihla ngezikhathi zokuhlupheka?

2 Ngobuqholo bakhe umuntu omubi uzingela ababuthakathaka, abayengeka ngamacebo awakhayo.

3 Uzikhukhumeza ngezinkanuko zenhliziyo yakhe; ubusisa abayizihwaba athuke uJehova.

4 Ngenxa yokuzigqaja kwakhe omubi kamdingi uJehova; kuyo yonke imicabango yakhe akulandawo kaNkulunkulu.

5 Izindlela zakhe ziyaphumelela; uyadelela njalo lemithetho yakho ikhatshana laye.

6 Uzitshela athi, “Akulalutho olungangixukuxa; ukuthokoza ngokwami lanini, angiyikufa ngahlupheka.”

7 Umlomo wakhe ugcwele inhlamba lamanga lezisongo; ulimi lwakhe luqukethe uhlupho lobubi.

8 Uyacathama ngaphandle kwemizi; avumbuluke lapho abulale abantu abamsulwa, abelokhu ebacwathele ekusithekeni.

9 Uyacathama njengesilwane ekusithekeni; ucathamela labo abangelamandla; uyabadumela abahudulele emambuleni akhe.

10 Ababambileyo uyabachoboza baphangalale; uyabawisa ngamandla akhe.

11 Uzitshela athi, “UNkulunkulu usekhohliwe; uyabugubuzela ubuso bakhe angabe esabona.”

12 Vuka, Jehova! Phakamisa isandla sakho, O Nkulunkulu. Ungabakhohlwa abazihluphekelayo.

13 Kungani na umuntu omubi ethuka uNkulunkulu? Kungani na ezitshela esithi, “Kazukungithonisisa?”

14 Kodwa wena, O Nkulunkulu, uyalubona uhlupho losizi; uyakunanzelela ukuze ulamule. Ongelamandla uzilahla kuwe; wena ungumsizi wezintandane.

15 Yephula ingalo yomuntu oxhwalileyo, omubi; mthonisise ngokuganga kwakhe obekuzahlala kungaziwa.

16 UJehova ungumbusi kuze kube nini lanini; izizwe zizabhubha elizweni lakhe.

17 Uyazizwa, O Jehova, izizindlo zabacindezelweyo; uyabaqinisa, uyalalela ukukhala kwabo,

18 ulamulele izintandane labacindezelweyo, ukuze kuthi umuntu, ongowasemhlabeni, angabe esesabeka futhi.